مخبيش عليكم أنا كنت عايز أكتب مقالي النهاردة عن الكوسة اللي في كل حتة في بلدنا .. وبصراحة الموضوع واقف معايا ومش عارف أكتب حاجة .. فقلت أستعين بالحج أبويا جمعاوي الكبير يمكن يقولي فكرة .. لكن بصراحة ححكي لكم المرة دي قصته هو زي ما قالها..
روحت لبابا وقلت أعيش عليه الدور عشان يقولي أي فكرة أكتبها ..و رحت باصصله جامد وقلتله أنت عارف يا بابا "لو نهر النيل كان صلصة ماكنش يكفي الكوسة اللي في مصر !! "
رحت لقيته بيبص قدام كده قال وكأنه بيفتكر حاجة من أيام زمان .. وراح متنهد وقال هيييييييه يا بني
الكوسة اللي عايشة فيها البلد من أول فوق لحد الكوسة اللي في فرن العيش خلت الواحد مش طايق العيشة واللى عايشنها..
مواقف كتير اتكوس فيها لناس وأنا اتحلقلي وبقيت عامل زى قرطاس الجوافة(قصدى قرطاس لب أو كيس جوافة ..أختاروا أعبطهما) وأكتر المواقف اللي أستحبط منها لحد ماكنت حستجنن..لما مسكت الجرنان فى يوم كالمعتاد عشان أكمل مسلسل النفخ اليومي من كلام الجرايد ..قعدت أدور على وظيفة فاضية..وفجأة...لقيت إعلان نص صفحة ..وكان أغرب إعلان عن وظيفة شفته فى حياتي
قال إية مطلوب محاسب ويكون:
خريج 2003,وسنه 26 سنة وشهرين و10 أيام ,ويكون طوله 175.5 سم ويكون اسمه محمد أحمد علي ويكون أمه اسمها أم السيد ويكون ساكن فى جناكليس فى عمارة صفراء فى الدور الرابع الشقة اللي ع الشمال, ويكون مبايله إركسون ,وأخيرا يكون خاله رئيس مجلس الإدارة.....
فعلا كنت حستجنن ..لكن عشان أنا وقتها كنت فاضي .. والإعلان فيه كمية إستعباط ملهاش حل ..قولت أروح أرمي الجتة وأغلس ..و أهو نضيع وقت وكمان نشوف البيه المحاسب ده شكله إيه ..وصلت الشركة وإتفاجئت لما لقيت كمية بشر ضخمة جم عشان يغلسوا زيي ..المهم بعد طول إنتظار ..جاء السكرتير و علي الملأ جمعنا فى قاعة كبيرة ونادى على واحد بس طبعا (محمد أحمد علي ) وقعده قدام على كرسي متميز وأمرنا بالسكوت عشان المدير جاي ....جاء المدير ونادي :فين محمد أحمد علي ؟؟؟ فقال الباشا :أيوة يا فندم , راح المدير قعد على الكرسي المقابل للباشا..وطبعا الباشا (محمد أحمد علي) قاعد بكل ثقة ولا همه ..لأنه عارف إنه كده كده شغال بس المشكلة إن المدير فاجئه وهو بيضحك ضحكة خباثة ...وقاله أنت حيتعملك دلوقتى إنترفيو جامد قوي ..الواد قصدى الباشا وشه جاب ألوان وقالك بس إتفضحت قدام الخلق.. المهم بدأت الأسئلة الجامدة المتوحشة الرهيبة ..وإحنا قلنا الحمد لله أهو حتى لو ما إشتغالناش أهو دم الواد قصدي الباشا حيتحرق قدامنا وعشان يحس بينا ..
وأول سؤال سأله المدير لقيناه بيقول :السؤال الأول ولقينا السكرتير بيقول (تاتا..تاتا..تااااا..دم..دم)..زي (من سيربح المليون) والعيال ساقت فيها وقعدت تقول (تك تك..تك تك)..(برضه زي من سيربح المليون)
والمدير برق للواد وقال :اسمك الثلاثى ..محمد أحمد علي ؟!!!!
العيال إتخرست لما سمعت السؤال ..والواد راح مستعبط هو راخر وسكت شوية قال يعنى بيفكر ..وراح قايل: صح..راح المدير صرخ بصوت عالي (الإجابة.......صااااااااااااحييييحة) هه...راح السكرتير قعد يصقف
المدير كمل الأسئلة بنفس الصعوبة طبعا :خريج 2003؟؟عند26 سنة وشهرين و10 أيام ؟؟أمك اسمها أم السيد؟؟خالك رئيس مجلس الأدارة؟؟....والواد يستعبط ويقعد يفكر وبعدين يجاوب ويقول ..صح
قعدت أنا والعيال مبرقين مش عارفين نعمل إيه؟؟ من اللي بيحصل وحصلنا بله مغولي من عباطة الأسئلة ..والعيال قعدت تزعق ع اللي بيحصل فى البلد..واللي قعد يخبط دماغه فى الحيطة ويقول حرام عليكو يا ولاد.....(حذفت عشان الرقابة) واللى أغمن عليه ..وطلعت أنا أضرب كف بكف وأغنى .....دا حتى لونى بمبي لون كوستك يا مصر
من يوميات : أبو جمعاوي
الإثنين فبراير 23, 2009 12:50 pm