الجزء التانى من جمعاوى فى المصيف (جمعاوى فى امن الدوله)
كاتب الموضوع
رسالة
easy come easy go
المساهمات : 131 تاريخ التسجيل : 02/02/2009 العمر : 36
موضوع: الجزء التانى من جمعاوى فى المصيف (جمعاوى فى امن الدوله) الجمعة فبراير 27, 2009 4:56 am
كان بصراحة جامد ومكتوب فيه كلام يعنى يعنى... ....يعنى كان لازم اشييله بس هسيب تلميحات منه بس
بس عشان اللى ماشافش فيلم الكرنك او الافلام المشابهة الجديدة واكتشفت ان الميه والنور ليهم استخدمات تانية خالص
يالا خير ان شاء الله المهم ان اطرافه موجودة وعمليات التجميل موجودة والعلاج النفسى كمان
ألحقوا..جمعاوي اتمسك وراح أمن الدولة
انا مش مصدق نفسى انا جمعاوى اتمسكت فى امن الدولة يانهار اسود مانا عارف اللى هيحصل وانا اللى كنت لابس الحتة اللى عالحبل ومطقم طيب ادى طقم رااح انا مكسووووووووووف اوى ياريتنى طيب كنت لوحدى تؤ ...انا اصلى رجلى شكلها وحش والواد خالد دايما يتتريق عليها عموما كلنا هنتتريق على بعض حالا ومكملتش افكارى السودا دى الا ودخل علينا عسكرى يشبه ميدوسا فى جمالها وجاذبيتها وعليه شنب يمتد نص متر حول حدود وجهه من جميع الجهات بصلنا بصه مريحتنيش ابدا وفى عنيه معنى خايف يكون صح وصرخ فى وشنا وقال بصوت مليان شماتة وخبث: يالا يخويا منك ليه الضابط عايز يشوفكوا قلنا بيأس:ماشى ياباشا ادينا جايين ايدك ياد ياخالد لاحسن مش حاسس بركبى يظهر سقعان شوية ولقيت الراجل سمعنى من هنا وقعد يضحك واعوذ بالله من ده منظر امال ده لو زعل هيبقى شكله ايه وراح قايل وهو مش ملاحق يمسح البلاوى اللى بتقع من الكوخ اللى فتحه ده وهو بيضحك:سقعان يخويا ههعهعهعهعهعهع طيب يالا بقى عشان كلكوا هتسقعوا دلوقتى مقابلة الضابط ليها مظهر معين هيشوفكوا بمناظركوا المقرفة دى يعنى هو ناقص قرف يالا ياد منك بالذوق كده بدل ماجيب اللى ي....بالعافية ويبقوا سيبوا الهلاهيل دى هنا بس فى ركن جتكوا القرف ناقصين بقى احنا عرق وبلاوى عالصبح هعهعهعهعهع قمت وصرخت فجأه فى لحظة تهور (ندمت عليها بعد كده):لالالالا مش جمعاوى اللى يقف كده قدام حد انا مش هتخلى عن اصغر فتلة فى الهدوووم دى انا مش هعمل كده اللى عايز يدوق قبضة جمعاوى يجرب كده عشان يبقى مضى شهادة وفاته ياايده الراجل وشه جاب الوان وراح منادى على زمايله اللى للاسف كانوا اكثر ضخامة وبشاعة: خدوا الواد انفرادى وجهزوه للضابط بس عايزه بقى وهو جاى ميقدرش يبص لحاجة غير الارض ...من الخوف ..مهو اهاليهم ميربوهمش واحنا بقى اللى نربى يالا الواحد يعمل الخير ويرميه المجارى هعهعهعهعهعهعهعهعهعهعهعهعهعهعهع
وبعد ما اخوكوا جمعاوى بقى جاهز لمقابلة (....خصوصى) مع الضابط و مساعدينه (ومش هحكى بقى جهزونى الزاى المهم ان محدش من العيال شافنى ) المهم سابونى مع نفسى فى ركن مش عارف اصدق اللى انا فيه.........والارض غرقانة ميه (ولاد ال....)ساقعة وفيه حاجة فيها مش عارف ايه بس بتلسعنى اوى .....وخصوصا بالوضع اللى انا فيه ده ...اتلسعت اوى منهم لله ..........(بكااااء) ربنا ينتقم منهم............. دخل الاخ اياه وقالى: بتقول ايه يالا جتك القرف فى منظرك بتبرطم بتقول ايه يخويا تحب اولعلك التكيييف. لأ لأ جمعاوى محدش يعايره ...امسك نفسك ياجمعاوى افتكر انك من العظماء ....عادى هتتبهدل شويه وتسقع وتتعود على تيارات الهوا تلسوعك من كل حته فى الاخر لما تكوم نفسك وتوصل الى طموحك الكبير هتلبس اغلى بدلة فيكى يابلد والمخبرين اللى .........هم اللى هيتخانقوا عشان يشتغلوا عندى لبيسة (هبقى اشترى هدوم ان شاء الله مش مهم الحاضر المهم المستقبل)... فقت من افكارى على ايديه اللى زى ال......وهى بتغمى عينيا برباط اسود ريحته والعياذ بالله زى كفن الفار...
وجرنى من مكانى وانا خلاص الدمعة هتفر من عينى من القهر اللى حاسس بيه وقال هيوصلنى للمفاعيص اللى جيت معاهم تمهيدا لعرضنا على الضابط (منهم لله...)عشان يشوف ......هيبدأ بمين؟ ورمانى فى ركن ومكنتش شايف حاجة بس سامع اصوات حد بيحاول يتحرك ..وقلم بينزل على قفا حد ................................... كنت معصوب العينين فى وضع القرفصاء..حتى شعرت بأحدهم يجلس بجواري .. انتفضت مذعور وأنا أصرخ عندما وضع يده على كتفى .. أنت مين؟!!
- اهدا يا جمعاوي..أنا خالد عمر..
- خالد عمر..وأنا إيش ضمني إن أنت خالد عمر .. وبعدين أنا أساسا معرفش حد اسمه خالد عمروشيل ايدك من على كتفى اوعى تقربلى خالص عشان هموت من الحر ..ال.بلوفر بتاعى اتقطع والراجل اللى زى ال.... بيشدنى ناس معندهمش احساس .
- مات من الضحك وقالى:يا بني أنا خالد..حتي بأمارة البلف في العوامة.. وفى نفس الوضع اللى انت فيه بلا بلوفر بلا فنلة يخويا ما تخفش محدش فينا شايف صابع رجله حتى....متخفش بقى وسيبك من الحر ده يخويا.. - أيوه البلف في العوامة..يبقي أنت خالد عمر فعلا..الله يخرب يبيتك..قعدت أقولك بلاش نصيف .. احنا مش مكتوبلنا فسح..أدينا روحنا في داهيه عجبك بقى منظرك وانت قاعد كده مصيف عالاخر.
- ولا داهيه ولا حاجه .. أنت بس سيبها على الله وهو هيحلها وهيستر علينا ان شاء الله..
- ياعم أنا الفيلم الوحيد اللي شفته هو فيلم الحمار والتنين
- حلو أهو انت بقي هتبقي الحمار
- الحمار؟؟.. إزاي يعني؟؟ ..لأ.. كله إلا كده..
- يابني ما تفهمش غلط..أنا قصدي ان همه هيربطوك في الحنطور .. وحيحنطروك
- جامعاوي السيد جامعاوي..هكذا هتف المخبر اياه ينادي علي اسمي.. سحبني من يدي..وأخذ يمشي بي في ممرات ودهاليز..وسلالم تشيلني..وسلالم تحطني..فيــــــن لقيته بيقعدني علي كرسي خشب مليان مسامير قلاووز(بتشوكنى اوى حراام اللى بيحصل ده جمعاوى مش ملاحق ياجماعة ...انا بكره المسامير ) . وواحد ذو صوت أجش صارم يخاطبني ويقول..
- إزايك يا جمعاوي؟..كويس؟؟..
-الحمد لله يافندم..بس الغمامة دي مصهدانى شوية..
-توء .. توء .. إزاي يعملوا كدة الحيوانات دول؟! ..وادي الغمامة يا سيدي..
-وجدت نفسي في غرفة مظلمة خاليه من الأثاث إلا مقعدي ومكتب أمامي بينما أخذ الضابط يدور حولي وهو ينفث دخان سيجارته ثم وضع يده علي كتقي (بردوا وبعدين مع العالم دى بقى) وبيبصلى بنظرات مش هى وفيها تشفى واضح وشماتةومال عليّ قائلا :قولي بقي يا جمعاوي آخر مرة شفت فيها أبو طلحة الأفغاني كان إمتي؟؟
-أبو طلحة مين يا فندم؟!!!
-أبو طلحة الأفغاني يا روح خالتك..إيه.. مانتش عارف؟!!!
- يا فندم أنا أعرف جمال الدين الأفغاني..الحشيش الأفغانى..لكن أبو طلحة الأفغاني دة أنا أول مرة اسمع عنه
-طب بلاش أبو طلحة .. الأسلحة فين؟؟
-أسلحة.. أسلحة إيه يافندم..ده أنا عمري مامسكت مسدس ده أنا حتي وأنا صغير أبويا كان بيجيب لإخواتي كلهم مسدسات ويجبلي أنا عروسة
-طب بلاش الأسلحة..المتفجرات فين؟؟
-يانهار أسود متفجرات..ده أنا بخاف من البومب..والله يا فندم أنا معرفش حاجه عن الكلام ده..من الواضح إن في سوء تفاهم
-آآآه سوء تفاهم..لأ..أنا بقي اللي هوريك سوء التفاهم..ثم صرخ بعلو حسه :كهربا يا جابر
ودخل جابر..حاجة كدة شبه باب القلعة ..أو تلاجة 48 قدم .. شلاضيمه..اللي هي الشفايف عندنا..فوقها مكنسة سودا زعف كشبه الشنب..بينما يكشف فمه عن فك .. أشبه بالفك المفترس يتساقط منه اللعاب كالذئاب المسعورة .. نظر إليّ جابر نظرة مخيفه جعلتنى أشعر بشعور نسيته منذ أن كان عمري سنتين ايه الميه السخنة اللى حوطتنى فجأة دى !!!!!!
قعدت انكمش على نفسى لحد مابقيت شبه الدودة ونظرت للضابط مستفسرا وسألت: مين ده يا فندم؟؟!!
-ده .. ده يا سيدي اللي أكل دراع "فان دام" في فيلم "تايتنيك"
-ازدرت ريقي في صعوبة ثم قلت :طب هو إيه اللي جايبه دلوقتي ..هو لسه ماشبعش
-لأ..ده جاي يكمل الفيلم .. بص بقي ..أنا عندي هنا كهربا متوصلة م السد العالي مباشرة لو لمّستها فيك هرجعك عيل في بطن أمك وانت ماشاء الله جاهز تمام اوى مش كده ولا ايه ؟ هههههههههههههههه جمعاوى بيعيط يارجالة انا مش هقدر ارفع راسى تانى على الاقل لمدة سنتين خلصت الوصلة بتاعتى وابتلعت ريقى وحاجات تانية وقلت لنفسى ربنا مش هيسيبك ياجمعاوى ..انت من الاحرار ياجمعاوى .. -نظرت للضابط قبل ماكمل الفيلم بتاع الاحرار ده:طب وحضرتك حتستفاد إيه لما ترجعني في بطن أمي؟؟ .. ده حتي مش هتعرف تكمل التحقيق .. وبعدين حضرتك أمي ست كبيرة معديه الستين يعني ماهياش أد حمل و ولادة من تانى
-خلاص... يبقي ترحمها وتتكلم
-خلاص يا فندم بدل الموضوع وصل للأم يبقي أنا هعترف بكل حاجه: هو منه لله خالد عمر هو اللي فسا العوامه.. أنا قولتله يا خالد ما تفسيش العوامه..أنت ماعندكش إخوات بنات.. لكن هو ماسمعش كلامي وفساها.. راح مروان حفرله حفرة في الرملة ووقعه فيها.. ساعتها بقي كان محمود ماجد مأجر بيتش باجي عشان يروح يجبلنا بيه أكلة سمك .. بس كان ماعهوش بطاقة فأخذ بطاقة إسلام وداها للراجل .. قوم لما محمود اتأخر .. الراجل خد هدوم إسلام المتعلقة في الشمسية فلما جه محمود .. إسلام قاله : أنت بستهبل يا محمود؟؟ .. إيه اللي أخرك؟؟ .. قاله: كنت بلف بالبيتش باجي شوية يا أخي!! .. وبعدين أنت شريكي؟! .. فإسلام اتغاظ فرمى شبشب محمود في البحر .. فمحمود حب ينتقم منه .. فعمله سندوتش جبنة بالخنافس .. وإسلام كان فاكره زتون فأكله .. فلما عرف قعد يرجع على هدوم خالد عمر .. اللي كان فسى العوامة.
- بس .. هي دي كل الحكاية يا سعادة البيه .. وأنا والله برئ
"تم إخلاء سبيلي من سرايا النيابة لعدم وجود تهمة بعد أن تأكدت النيابة أن البلف فعلاً مش عايز يخش في العوامة .. وقد أحيل الضابط للعمل بقسم المطافي .. بعد أن أصيب بنوبات عصبية من التحقيق معي" وبالنسبة ليا فضلت مش قادر افتح نور اوضتى لمدة شهر ولما فتحته جبت وناسة صغيرة كبداية زى مانصحنى الدكتور النفسى اللى هتابع معاه الكام سنة الجية عشان اعرف ارجعلكم جمعاوى احد اهم الرجال فى منطقة الشرق الاوسط والمهئ للدخول فى موسوعة جمجم للعظماء"..
اصلى مت من الضحك لما قريت الكلام اللى كتبه عن اللى بيحصل فى امن الدولة
بس على فكرة الموضوع ده كان من فترة طويلة بتاع خمس او ست شهور
وجمجم دلوقتى ابتدى يتعود يتكلم تانى مع الناس ويقابلهم عادى
بس بقى اميل انه يتكلم فى مواضيع تانية وظلت مشكلته الوحيدة ان شعره مش راضى يقف خالص ولا كل الكريمات والحلاقين اللى راحلهم قدروا يوقفوه تانى ضاع السبايكى بتاع جمعاوى شعره ياعينى من اللى شافه اتشل ومش قادر يصلب طوله بس هو مين بردوا لقيته رجع للكلام اياه تانى اما نشوف هيتعمل ايه تانى فيه اكتر من اللى اتعمل
يستاهل مايجراله لما تشوفوا الكلام اللى كتبه من تانى اكيد هتقولوا زيى تستاهل اللى يجرالك ياجمعاوى
يارب تكون عجبتكوا المغامرة المرة دى ولنا لقاء اخر مع بهدلة جمعاوية اخرى
الجزء التانى من جمعاوى فى المصيف (جمعاوى فى امن الدوله)
الجمعة فبراير 27, 2009 4:56 am
