انت ياواااد يامنيل على عينك هتقوم ولا هاجى اقطع الش......ده فوق دماغك
يابو جمعااااااااااوى ماتتدخل ياخويا تزعقلك زعقتين فى الواد ابنك الضايع ده خليه يحس على دمه ويروح يشوف مذاكرته
انت ياواد جلدك تخين مش بتحس على دمك ...ايه!نام وارتاح يأتيك النجاح؟؟؟؟هو ده تفكيرك
طب والنبى مانا عاتقاك امسك قدامى ياواد يامشمش اصل الصنف ده لازم ياخد على دماغه عشان يتحرك
---------- ------- وهكذا دواليك الكلام ده بيتقال لجمجم طول النهار والليل
بصراحة كلام يحرق الدم وينرفز انا نفسى اتخنقت وانا بسمع منه
بس الميزة بقى ان جمعاوى فعلا جلده تخييييييين مش مضايق اوى غير من علامات الشبشب اللى بتبان على مكان الحجة مابتقوم بعملية تنفيضه
كمان خايف يسقط تانى
المرة دى مش هرحمه عشان كده عمل جدول مذاكرة بس ايه
مايخرش المادة
جامد يعنى جدول فعلا يليق بآآل جمعاوى
تعالو نتعلم منه بقى فرصة لن تكرر
" يوميات جمعاوي مذاكر جدا"
الأثنين 19/12
يا نهااااااااااااار أبيض ايه ده يا جامعاوي اللي بيحصل انت كنت في غيبوبة ولا ايه يا جامعاوي فاضل اسبوع واحد بس على الأمتحان نهارك مش فايت يا جامعاوي انت لسه فيه مواد ما فتحتهاش من اساسه ولا تعرف عنها حاجة يا وقعة مش معدية ...خلاص يا جماعة انا حاسس إن انا ضعت ..ضعت ضعت ..
لكن لأ يا جامعاوي مش انت اللي تضيع لو انت اللي تضيع يبقى مين اللي ما يضعش وكما قال الشاعر : لو ضاع جامعاوي فمن ذا الذي ليس بضائع
كل البشر ذهبوا في دهية لوضاع جامعاوي الرائع
خلاص يجب أن اعلنها عالية مدوية مذاكرة حتى الموت هو ده شعار المرحلة ......مذاكرة حتى الموت
- ياجامعااااوي ....
مين اللي بينادي من الشارع ده ..هو ده وقته ده صوت الواد سيد مستيكة.
- أيوا يا سيد ...
- مش حتيجي تتفرج على الماتش عندي في البيت ولا ايه .
- لالالا ....انا ورايا مذاكرة
- يعني هو من أمتى انت بتذاكر من أساسه يا عم فكك يلا بس ماتش يفوت ولا حد يموت .
- لالا يا سيد شعار المرحلة دلوقتي مذاكرة حتى الموت ..
- مرحلة ايه ؟؟ ومذاكرة ايه؟؟ انت حر يا عم موت انت براحتك وانا رايح اتفرج على الماتش .
أي... أي ....ايه اللي بيوجعني ده ..ضميري الكروي بينغز عليا يا شباب
- طيب آآآآ...آآآ أستنى يا سيد آآآآ أنا جاي معاك
- طيب وشعار المرحلة يا فالح ؟؟؟
- ممكن أجراء تعديلات بسيطة عليه ...
- أزاي يعني يا عبقري زمانك
- ممكن نخليه مذاكرة بعد الماتش .
الثلاثاء 20/12
خلاص النهاردة يوم الحسم النهاردة يوم الخلاص ..خلاص يعني خلاص .
بس طبعا لازم الشغل يكون على مية بيضا لازم جدول مذاكرة وحبة شغل كده في الأوضة أعملك جدول مذاكرة كده ..ولازم يكون حاجة محترمة بقى ...
طيب أيه رأيك يا واد يا جامعاوي تكتبه كمبيوتر وتعلقه شكله حيبقى شيك أوي ...وبعدين انت عايزلك كده تعلق كده كام ورقة علشان ترفع همتك يعني تكتب كده ورقه مكتوب عليها سبعة أمتياز إن شاء الله ...وكمان ورقة تكتب عليها الراجل العادي يبذل مجهود مش عادي ...حاجة تقوي نفسيتك على المذاكرة
يااااااااه الكمبيوتر بايظ صحيح ..خلاص أنزل أكتبه في السيبر اللي على اول الشارع
جاتلي فكرة جهنمية ..
عقبال ما أحمد فلوبي اللي شغال في السيبر يخلصلي الجدول والورق أقعد على النت ساعة كده علشان أشوف طرق المذاكرة العلمية الحديثة واتصفح المواقع النفسية اللي فيها وصفات مجربة عن الكيفية الصحيحة للمذاكرة أهو كده يبقى الشغل على مية بيضة ... وبالمرة أشيك على الأيميل يمكن في جديد ..وكمان شوية سلامات على حبايبي في الماسينجر ...
وياسلام كمان يا جامعاوي كده لو ايميلين تلاتة محبة للناس اللي بقالك كتير ما شوفتهاش ..
إلا أخبار الآي سي كيو أيه ..بيقولوا بقى يبعت ماسيدجات لموبايلات فودافون كمان يا سلام كده لو كام ماسيدج للحبايب تطلب منهم يدعولك ربنا يوفقك السنة دي ...
ويا سلام كمان يا جامعاوي لو تروح تنام علشان تصحى بكرة بدري وتذاكر من أول اليوم
الأربعاء21/12
الساعة 12 ظهرا
بس كده خلاص جينا للشغل الصح ...وضعنا شعار المرحلة ....وحطينا خطة خمسية كده يبقى نشتغل على مية بيضة
لكن مش عارف ليه حاسس أني تعبان ومرهق كده ومش في " المود " يمكن علشان ما فطرتش طيب أقوم أفطر وبعد كده حبقى في " المود "
الساعة 1 ظهرا
فطرت اهو يا عم الحاج ملكش حجة بقى ...لكن مش عارف ليه لسه مش في " المود " طيب ساعة كده أروح عن نفسي ما هو لازم الترويح عن النفس ده يعني هي المذاكرة حتبقى 24 ساعة ده حتى حرام وظلم وربنا ما يرضاش الظلم
الساعة 2 ظهرا ...
مفيش مشاكل كمان ساعة ترويح علشان انا حاسس أني مش في المود.
الساعة 3 عصرا ...
كمان ربع ساعة بس ترويح عن النفس........... ( تم تكراره اربع مرات )
الساعة 4 عصرا
الغدا ...أكيد الغدا هو اللي حيخليني في مود المود ....
الساعة 5 المغرب
ساعة تمشية لتصريف الغدا وبعدها ابقى في المود ....
الساعة 6 عشاءً ....
المود مش موجود
الساعة 7
مفيش مود
الساعة 9 ليلا
خارج نطاق الخدمة
الساعة 12 ليلا
مود يا حمار ...
الخميس 22/ 12
مصدع
الجمعة 23 / 12
زهقان
السبت 24/12
تعبان
الأحد 25/12
ورمان
الأثنين 26/12
الأمتحان
جدول جامد جامد جامد
انا حسيت بالغيرة منه استاذ فى وضع الجداول لا ومش بس كده تنفيذها كمان
ده هنحتاجه السنة دى بقى يبقى يذاكرلى بقى
عموما يوم النتيجة هيبقى يوم ذو طابع خاص
يأما جمعاوى هيفضل موجوود ياما هيتمسح من سجل المواليد
اهو خلص امتحانات الله اعلم عمل ايه بقى مش قضيتنا احنا بس عايزين فى صوت واحد ندعيله كلنا
يارب تنجح ياتت......احم اقصد ياجمجم....
الدعاء يبقى بضمير شوية ياجماعة ده جمعاوى بردوا
كان جمعاوى قالى حاجة كده غريبة اوى
ال ايه سمع الشيطان وهو عالموبايل وآل بيكلم احد مرؤسيه وبيتابع معاه مسيرة العمل
السبت فبراير 21, 2009 8:37 am